2024an 20 urte beteko ditugu TAU Fundazioa martxan jarri zenetik, eta hori ospatzeko aurreikusitako jardueren artean, ekainaren 1ean eta 2an ospakizun eta bizikidetza topaketa bat antolatu genuen Arantzazun, urte hauetan, beste mundu anaiarteago, bidezkoago eta solidarioago bat eraikitzeko gure aletxoa eskaintzeko beharra partekatu dugun TAUko boluntario, kolaboratzaile eta talde teknikoko batzuekin batera.
Data horiek aukeratzeko arrazoietako bat izan zen ekainaren 1ean, larunbata, Gandiaga Topagunean “Arantzazu Afrikarekiko topaleku” jardunaldia ospatzen genuela. 54 pertsona hurbildu ziren, gehienak Iruñetik, Donostialdetik, Bilbotik eta Oñatitik etorritakoak, eta horietako asko TAUko boluntarioak eta kideak izan ziren. Arantzazuko Adiskideak elkarteak eta Gipuzkoako Afrika Behar Beharrezkoa hezkuntza-partzuergoaren GGKEak (Bakearen Aldeko Lankidetza Batzarra, Proclade Yanapay eta TAU fundazioa bera) antolatzen dugu jardunaldi hau. Afrikako zinemaz gozatzeaz gain, eta “Al Sur de Senegal” argazki-erakusketarekin gogoeta egiteaz gain, jardunaldi horretako programaren barruan, Sani Ladan irakasle eta jatorri kamerundarreko arrazakeriaren aurkako aktibistak emandako “Raza, represión y muertes en las fronteras” hitzaldia nabarmendu nahi dugu. Mintzaldi interpelante horrek, besteak beste, gogoeta egiteko aukera eman zigun, migratzaileenganako errepresioaren areagotzeari buruz, mugak kanpora ateratzeari buruz edo pertsona beltzaren figura bat migrazio-arrisku gisa eraikitzeari buruz.
Jardunaldi horren ondoren, bertaratutako dozena bat kolaboratzailek eta TAUko talde teknikoaren zati batek Asis Topagunean hartu genuen ostatu igandera arte, TAUren 20 urteko lana partekatu, ospatu eta baloratzeko.
Larunbatean bertan, Afrikari buruzko jardunaldiaren ondoren, Juan Ignacio Larreak Santutegian eginiko bisita gidatu paregabeaz disfrutatu genuen. Eta igande goizean TAUren 20 urteko lanaren balorazio-topaketa bat izan genuen. Bertan, datuak eta batez ere Hegoaldeko tokiko komunitateen eta bazkideen testigantzen bideoak partekatu ahal izan genituen, horiek baitira Elkartasun eta Lankidetza lanaren urte hauetako benetako protagonistak. Balorazio bilera honen ondoren eta Gomiztegiko egokitutako bide ederretik ibilaldi bat egin ondoren, Asis Topaguenan bertan egin genuen bazkari batekin amaitu genuen topaketa.
Azken finean, asteburu honek balio izan digu TAU familiarentzat pilak kargatzeko, gure loturak sendotzeko, orain arte egindako bide kolektiboa baloratzeko eta “beste mundu posible” hori eraikitzeko oraindik asko dugula ibiltzeko eta ekarpenak egiten jarraitzeko.
